प्रिती मन्डरको उद्यमशीलता यात्रा

त्रियुगा नगरपालिका –१३, बहेरवनामा बसोबास गर्ने प्रिती मन्डरको जीवन यात्रा एक प्रेरणादायक संघर्षको कथा हो । २०५६ सालमा १ कठ्ठा जमिनमा सानो तरकारी खेतीबाट सुरु भएको उनको व्यवसायिक यात्रा, महुलि लघुवित्त वित्तीय संस्था लि.को साथले एक अद्वितीय उचाइमा पुगेको छ । प्रिती विगत १६ वर्षदेखि महुलि लघुवित्तको गाईघाट शाखा केन्द्र नम्बर १७ की सक्रिय सदस्य रुपमा रहेकी छिन् ।
२०६४ सालमा महुलि लघुवित्तको केन्द्र नम्बर १३ की सदस्य बनेपछि, प्रितीले रु. १०,००० को कर्जा लिएर आफ्नो तरकारी खेतीलाई ३ कठ्ठामा विस्तार गरिन् । महुलि लघुवित्तले निरन्तर सहयोग गर्दै थप कर्जा उपलब्ध गराएपछि प्रितीले आफ्नो व्यवसायलाई अझ ठूलो बनाएर, आफ्नो भविष्यलाई तरकारी व्यवसायमै देख्न थालिन् । यस क्रममा, उनका श्रीमान ओम नारायण चौधरीले सधैं महत्वपूर्ण मेरुदण्डको रुपमा साथ दिइरहे र २०७२ सालमा कानुनी मान्यता प्राप्त इश्वर कृषि तथा पशु फर्म दर्ता गरेर आफ्नो व्यवसायलाई अझ व्यवस्थित बनाउने तर्फ लागीन् ।
प्रितीको मेहनत र लगनशीलता बिभिन्न चरणमा सरकारले समेत पहिचान गर्यो र रु. १००,००० सम्म अनुदान प्राप्त भयो। महुलि लघुबित्तबाट बिना धितो रु. ७,००,००० कर्जा चलाइरहेकी प्रितीले अहिले २ बिगाहा क्षेत्रफलमा विभिन्न मौसमी र बेमौसमी तरकारी खेती गर्दै आइरहेकी छिन् यसबाट उत्पादित सबै तरकारी गाईघाट बजारमा बिक्री हुन्छ ।
तरकारी खेतीबाट आर्जित आम्दानीले प्रितीले आफ्नो छोरीलाई विराटनगरमा सिभिल इन्जिनियर पढाइरहेकी छिन् भने अन्य छोराछोरी गाईघाट बजारमा नै अध्ययनरत छन् तरकारीको बजार मूल्यमा एकरुपता नहुनु र भारतीय सस्तो विषादीयुक्त तरकारीले कहिलेकाहीं दःुख लाग्ने गर्छ ।
प्रितीको सफलताको मूल रहस्यमा महुलि लघुवित्तको सहयोग, उनको कडा मेहनत, र परिवारको सहयोग प्रमुख छन् । प्रिती भन्छिन् ”देशका तीनै तहका सरकारले कृषि व्यवसाय गर्ने कृषकलाई समयमा मलखाद, उचित बजार मूल्य र बजार व्यवस्थापनको लागि पहल गरिदिए अझ राम्रो हुने थियो ।”
यस सफलताको यात्रामा महुलि लघुवित्त वित्तीय संस्थाले दिएको सहयोगप्रति प्रिती कृतज्ञ छिन् । प्रितीको कहानीले लैङ्गिक समानता र महिला उद्यमशीलताको महत्वलाई उजागर गर्दै प्रेरणादायी उदाहरण प्रस्तुत गर्दछ ।